:: ما تحتاجة من صيانة دورية بشكل عام وللجمس بشكل خاص ::

[نسكافيه]

بسم الله الرحمن الرحيم


اخواني في نادي عشاق وملاك الجمس والشفر الحوض

السلام عليكم ورحمة الله وبركاته

انه ما يسعدي ان يكون هناك حلقة وصل بيننا ومنبر للمشاركة من خلالة

وانه ما يزيدني فخر ان شارك معكم في هذا المنتدى

واسئل الله العلي العظيم ان يوفقنا لما يحب ويرضى ويعيينا على افادتكم ويوفقنا بالاستفادة منكم

..........................

الصيانة الدورية وما ادراك ما الصيانة الدورية

من خلال تجربتي مع الاخ العزيز (جمس سوبربان 2004)

والله من محبتي له اعده اخ ههههههههههه

تصفية المكينة خصوصا في جونا ضرورية جدا

بعض الاخوان الله يهديهم ينظر السيارة لين تخرب عشان يصلحها

وهذا سوف يقلل عليك الكثير

ابدا بالنقاط الاساسية في الصيانة الدورية والمعروفة في اكثر مراكز الصيانة المتقدمة والوكالات

ويمكنك الاستغناء عنهم بعمل النقاط التالية

- تصفية المكينة
يلزمها التالي ::

1- تنظيف البخاخات والهاة (الثروتل)
2-تغيير فلتر البنزين
3-تغيير البواجي
4-تغيير فلتر الهواء
5-تغيير السيور بعد 100 الف كيلومتر
6-تنظيف الاديتر مع مجرا المياة واستبدالها

- القير

تغيير زيت القير والدبل اذا كان موجود

- الدفرنسات

تغيير زيوت الدفرنسات



سوف اشرحها بالتفصيل المملل والاسعار التقريبية

يفضل تصفية السيارة كل 35 الى 40 الف

قبل كل شي عندي راي

يفضل انك تودي سيارتك لمركز متقدم عشان تخلص امورك كلها هناك

ومن فؤائدها فحص الكمبيوتر

افحص كمبيوتر

ممكن تحصل شي في السيارة خربان مثل حساس او كويل ونحوة

ويخصمون قيمة الفحص اذا صرت بتسوي صيانة عندهم

يعني كانك فحصت ببلااش

اولاً تصفية المكينة

1-تنظيف البخاخات

في اكثر الورش المتقدمة عندهم اجهزة خاصة بتنظيف البخاخات

وسعرها التقريبي 100 ريال

ويحبذ لو تنظف الهاة ببخاخ ACDelco

لانها البوابة اللي تفتح على الثلاجة

وطبيعي تكون وصخة ومتراكم عليها الاتربة

هي والماصورة حقتها

وهي احد اسابب تقطيع السيارة


2-تغيير فلتر البنزين

فلتر البنزين احيانا يكون داخل التانكي

يحتاج انك تنزل التانكي وتغيرة

وسعرة رخيص جداً

انا قد شريته ب20 ريال

ولكن الشغل اغلى شوي

ويحبذ لو تنزل التانكي تغسله ببنزين نظيف

اكيد بيكون وصخ وعشان تخلي مجرا البنزين نظيف بدون مشاكل ان شاء الله

3- تغيير البواجي

معروف انه لابد منها

والبعض يحذر من بواجي ACDelco

ولكن عن نفسي مالقيت مشكلة

وبعض الشباب الله يهديه يركب بواجي راسين او اربعة

هذي ماتفرق ابدا

بواجي راس واحد تقوم بالمطلوب حتى في الاداء الرياضي احيانا

ويحبذ تغيير البواجي مع الاسلاك لظمان وصول الشرارة بالطريقة الصحيحة

4- تغيير فلتر الهواء

هذي يفضل لو تكون مع تنظيف البخاخات والهاة

وفكها وتركيبها كما هو متعارف عليه

سهل جدا

وسعر الفلتر حدود 70 ريال

5- تغيير السيور

الجمس عادة له سيرين

واحد للمكينة وواحد للمكيف

بعد 100 الف كيلومتر السير يقسا شوي ويتلف ويكون عرضة للقطع

والسيور مع شغل اليد حدود 100 ريال

6- تنظيف الاديتر مع مجرى المياة واستبدالها

هذي حقيقة يغفل عنها بعض الناس

جودة موية الاديتر لها دخل في تبريد المكيف

ويعتقد البعض انه نقص فريون وما شابه

تنظيف الاديتر يكون بفك الخرطوش الطالع من المكينة وتركيب خرطوش بدالة يدخل على الاديتر الى الطرمبة الى المكينة والى برا

وبعد ذلك يتم ارجاع الخراطيش الى مكانها ويصب موية اديتر جديدة

وعادة ما تكون النسبكة كالتالي

50% موية اديتر خضرا او حمرا و 50% موية مقطرة

واحذروا كل الحذر من استعمال الموية الخضرا السعودية

يفضل ACDelco

وسعره حدود 60 ريال ,,, كرتون الموية المقطرة حدود 25 ريال ,,, شغل يد 30 ريال

وتاكد من سلامة الخراطيش والقفيز واستبدها اذا استدعى ذلك

وهذا يساعد كثيييييرا في تقليل الحرارة وتبريد المكيف

ويحبذ تنظيفه كل بداية صيف



تصفية القير

اولا القير

القير عادي مالي علم به ولكن بعرض تجربتي مع القير التماتيك

هذي ايضا حاجة يغفل عنها الكثيرون

وهو زيت القير

وخصوصا مع جونا الحار

زيت القير يتم تغييرة كالتالي

بعضهم يفك الكرتير حق القير وبعضهم يشفطة من مكان العيار وهذا افضل

بعد ما ينزل الكرتير ينظف الكرتير ببنزين وبعدين بموية

وينظف قطعة المغناطيس معه

ومطلوب منك تجيب من محل قطع الغيار

1- 5 علب زيت ACDelco للقير
2-فلتر قير مع وجة (وهو عادة مايكون للجمس والكابرس لانها نفس القير (4L60E) وتكون مع بعض وسعرها حدود 80 ريال تقريبا ناسي والله بالظبط
3- صمغ للوجة (معروف عند محلات قطع الغيار)

تكلفك كلها تقريبا حدود 200 ريال

نصيحة قد نصحنياها واحد مجرب

القير فيه مبرد داخلي ويبرد على قدة

ولكن فيه مبرد قير يكون اديتر صغير قدام اديتر المكينة ومروحة صغيرة

هذي تريح القير بشكل كبير

وتركب في ترايستار وسعرها حدود 450 ويعطونك ظمان بعد

ثانيا الدبل

زيت الدبل ذو الاهمية الكبيرة ومايكلف كثير ( حوالي علبتين او علبتين ونص )

ويفضل تغييرة


زيوت الدفرنسات

البعض يعتقد ان زيت الدفرنس يزاد فقط ولا يغير

وهذا كلام غير صحيح

زيت الدفرنس يتاكل حالة حال زيت المكينة والقير والدبل

الزيت اللي يزاد هو زيت الفرامل والدركسون ونحوها

لان فايدها ظغط وليس حماية من الاحتكاك


اخيرا وليس آخرا

اتمنى ان الموضوع قد نال اعجابكم

وافادكم

واي خدمة او استفسار انا حاضر :)

ولا تنسونا من التقييم والامورو الحلوة :)

** للتنويه

الموضوع هذا اجتهاد شخصي

وانا لن احلل من ينقل الموضوع بدون ذكر المصدر


نراكم في موضوع اخر ان شاء الله

[عاشق z71]

اولا الله يجزاك الف خير يالغالي على هالمعلومات الطيبه

وفعلا هذي الاشياء الي نحتاجها هنا بالقسم هذا

ثانيا عندي استفسار بسيط يمكن يكون عندك خبر


ذكرت انت فيما سبق عن موية الرديتر تبرد المكيف

قبل فتر المكيف ظعف عندي ورحت عبيت فريون

وظبط بس اذا وقفت بدا يطلع هو

تتوقع من موية الرديتر مع العلم ان المويه الي فيه حمرا من الصاله الي شريته هم حاطينه

ومره ثانيه الف شكر لك

[طارق الحربي]

يعطيك الف عافيه

والله انها حاجات واجد لازم الواحد يتفرغ كم يوم

جزاك الله خير

[تناهيت]

بارك الله فيك شرح وافي وكافي للصيانة الدورية والكثير منا يجهل بعض النقاط مما يؤثر على العمر الأفتراضي للقطعة ومن ثما لعمر المحرك ..

بالنسبة لغسيل الرديتر ........>فعلا ضروري ومهم ويفضل كل 6 أشهر مرة للمحافظة على دورة الموية ومن ثما التبريد وضمان عمر اطول للرديتر وخاصة النحاس ..

ابو غازي ......>مشكلتك مالها دخل في الرديتر واتوقع من الكمبرسر لأن اللي فهمت انه يقوى ويبرد عند دوران المحرك وقد يكون مكتوم ((شيك على الفلتر الداخلي )) وافضل فكه نهائي وجرب هم طبقه ثانيه قبل لا تلمس الكمبرسر ..

أخلص تحياتي

[عاشق z71]

ابو غازي ......>مشكلتك مالها دخل في الرديتر واتوقع من الكمبرسر لأن اللي فهمت انه يقوى ويبرد عند دوران المحرك وقد يكون مكتوم ((شيك على الفلتر الداخلي )) وافضل فكه نهائي وجرب هم طبقه ثانيه قبل لا تلمس الكمبرسر ..

أخلص تحياتي

والله يابو حمد الفلتر مافيه من عقب 2003 معد يركبونلها فلاتر وان قصدك الفلتر الصغير الي زي القلم غيرته

والكمبروسر وش تتوقع فيه يعني هل يبيله تغيير نهائي
واسف ياراعي الموظوع على المداخله

[نسكافيه]

اشكر الجميع على الردود


اولا الله يجزاك الف خير يالغالي على هالمعلومات الطيبه

وفعلا هذي الاشياء الي نحتاجها هنا بالقسم هذا

ثانيا عندي استفسار بسيط يمكن يكون عندك خبر


ذكرت انت فيما سبق عن موية الرديتر تبرد المكيف

قبل فتر المكيف ظعف عندي ورحت عبيت فريون

وظبط بس اذا وقفت بدا يطلع هو

تتوقع من موية الرديتر مع العلم ان المويه الي فيه حمرا من الصاله الي شريته هم حاطينه

ومره ثانيه الف شكر لك

والله ياخوك نفس الحالة اللي جتني

حتى ماشيكت على الفريون

رحت ونظفته والله حسيت بفرق

ونصيحة كان الموتر جاي بموية حمرا استعمل موية حمرا

وان كانه جاي بخضرا استعمل خضرا


وايضا

كان الموتر امريكي وما قد لمست اديترهـ

انصحك تنظفة لانك ماتظمن




يعطيك الف عافيه

والله انها حاجات واجد لازم الواحد يتفرغ كم يوم

جزاك الله خير

العفو اخوي هذا واجبنا


بارك الله فيك شرح وافي وكافي للصيانة الدورية والكثير منا يجهل بعض النقاط مما يؤثر على العمر الأفتراضي للقطعة ومن ثما لعمر المحرك ..

بالنسبة لغسيل الرديتر ........>فعلا ضروري ومهم ويفضل كل 6 أشهر مرة للمحافظة على دورة الموية ومن ثما التبريد وضمان عمر اطول للرديتر وخاصة النحاس ..

ابو غازي ......>مشكلتك مالها دخل في الرديتر واتوقع من الكمبرسر لأن اللي فهمت انه يقوى ويبرد عند دوران المحرك وقد يكون مكتوم ((شيك على الفلتر الداخلي )) وافضل فكه نهائي وجرب هم طبقه ثانيه قبل لا تلمس الكمبرسر ..

أخلص تحياتي

العفوا اخوي تناهيت

ولكن المشكلة صدقني احد الثنتين

بس الاحرى انها اديتر لانها قد صارت لي بالظبط




والله يابو حمد الفلتر مافيه من عقب 2003 معد يركبونلها فلاتر وان قصدك الفلتر الصغير الي زي القلم غيرته

والكمبروسر وش تتوقع فيه يعني هل يبيله تغيير نهائي
واسف ياراعي الموظوع على المداخله

لا عادي اخوي ماعندك مشكلة

وانا رايي بما ان موترك امريكي وماقد لمست اديتره

انك تنظفة وتشوف

لانك مضطر الموتر جاي من برا ماتدري وش في بطنة ويكمن اديتره وصخ

وبعدها تشوف بدال مايلعبون عليك حقين الورش

[متعب المعاميل]

وآفي الله يبيض وجهك

/

[نسكافيه]

وآفي الله يبيض وجهك

/

ووجهك ابيض يا ابو سند

[راعي وشيقر]

الله يعطيك العافيه ياخوووي ..

تستااهل الشكر والتقدير ..

موضووع مميز .. وكنت ابحث عن هالشي من زماااان ..

الله يعطييك العاافيه وماتقصر ..

بس عندي استفساار ..

انا مره غيرت زيت القير .. كان موتري جمس غماره ونص 2004 تماتيك ..

طبعا كان عن طريق الشفط بالمكينه ..

بس لاحظت انه يحطه في الريوس ويدعس له على خفيف وهو ماسك الفرامل والاحظ في المكينه تطلع زيت زياده لين يخف الزيت الطالع .. بعدين يحطه في d ونفس الطريقه .. وعلى كل النمر ..!

تتوقع شغله مضبووط ولاا لاا ..!؟

والله يعطييك العافيه ..

[نسكافيه]

الله يعطيك العافيه ياخوووي ..

تستااهل الشكر والتقدير ..

موضووع مميز .. وكنت ابحث عن هالشي من زماااان ..

الله يعطييك العاافيه وماتقصر ..

بس عندي استفساار ..

انا مره غيرت زيت القير .. كان موتري جمس غماره ونص 2004 تماتيك ..

طبعا كان عن طريق الشفط بالمكينه ..

بس لاحظت انه يحطه في الريوس ويدعس له على خفيف وهو ماسك الفرامل والاحظ في المكينه تطلع زيت زياده لين يخف الزيت الطالع .. بعدين يحطه في d ونفس الطريقه .. وعلى كل النمر ..!

تتوقع شغله مضبووط ولاا لاا ..!؟

والله يعطييك العافيه ..

الله يعافيك

خويك ذا شغله يخوف هههههههههههههه

مادري عنه ماخبرتها كذا

بس انا لين جيت اغير افك الكرتير بكبرة

لين قال لي واحد اشفط عن طريق العيار اخف لين تفكه

وهي كلها واحد

التعشيق والموتر واقف خبري به اول مره

عبو 4 علب ونص وقال لي عشق

واخرش القير من فوق لتحت لفوق لتحت بسرعة ههههههههههههههه <<< تراها غلط انتبهو

ويصير كل شوي يسحب العيار عشان يشوف

بس وزنة القير 5 علب الا شوي الى 5 علب كاملة


تحياتي لك

[ابوعقل]

وعليكم السلام ورحمة الله وبركاته

مشكور على الموضوع وان شاء الله يفيدنا

بس عندي ملاحظه على زيت الفرامل

زيت الفرامل مايتزود ولا تفتح علبته ابد

لان اذا نقصت القماشات او الفحمات نقص الزيت

واذا غيرت القماشات يبي يرتفع الزيت اللي بالعلبه

[RPK]

مشكور وان شاء الله نتبع النصائح

[نسكافيه]

وعليكم السلام ورحمة الله وبركاته

مشكور على الموضوع وان شاء الله يفيدنا

بس عندي ملاحظه على زيت الفرامل

زيت الفرامل مايتزود ولا تفتح علبته ابد

لان اذا نقصت القماشات او الفحمات نقص الزيت

واذا غيرت القماشات يبي يرتفع الزيت اللي بالعلبه

هلا فيك اخوي ابو عقل

ومشكووور على ردك ومرورك الكريم

وصدقت

مثل ماذكرت اول

زيت الفرامل فايدته ضغط مهوب حماية من التآكل


مشكور وان شاء الله نتبع النصائح

حياك اخوي

ومشكور على ردك

[عاشق z71]

انا مريت على هاالموظوع ونسيت اثبته:fjr67[1]:

معليش نسكافيه

ويستاهل التثبيت للفائده

[نسكافيه]

انا مريت على هاالموظوع ونسيت اثبته:fjr67[1]:

معليش نسكافيه

ويستاهل التثبيت للفائده

لا ابدا عادي الله يجزاك خير

ويثبتك على طاعته :)

[بندر]

يعطيك العافيه

[نسكافيه]

يعطيك العافيه

الله يعافيك

ومشكور على مرورك وردك الكريم

[123789]

جزاك الله خير.

[MTC_959]

الله يعافيك

خويك ذا شغله يخوف هههههههههههههه

مادري عنه ماخبرتها كذا

بس انا لين جيت اغير افك الكرتير بكبرة

لين قال لي واحد اشفط عن طريق العيار اخف لين تفكه

وهي كلها واحد

التعشيق والموتر واقف خبري به اول مره

عبو 4 علب ونص وقال لي عشق

واخرش القير من فوق لتحت لفوق لتحت بسرعة ههههههههههههههه <<< تراها غلط انتبهو

ويصير كل شوي يسحب العيار عشان يشوف

بس وزنة القير 5 علب الا شوي الى 5 علب كاملة


تحياتي لك

كلامك صح طبعنا

القير حساس جدا وسالفه انما يحطه في dبعدين يشيك هذي مرت علي على بي ام
تغير الزيت للقير

الاوتماتيك او العادي

اذا كان القير فيه لخبطه ولا في شكه اثنا ماتنزل الزيت القديم وشيكت على الزيت القديم تحصل اسود وفيه ريحه وتحصل معاه برادت حديد او بودره تفكرها غبار تقريبا اذن القير اللي زي كذا الافضل انك تزود ماتغير لان القير على وشك الانتهاء



لكن اذا القير اوكي
يعني من باب الصيانه الدوريه والمحافضه

تنزل كل الزيت وتحط زيت الوكاله اعيد زيت الوكاله لان القير حساس جدا

بعد مانحط زيت الجديد اصبر مدة 1000كم او شهر يعني على مايتعود الزيت على الحراره

سواَ عادي او تماتيك


وعلى العموم

القير فيه اجزاء حساسه مثل بيرنقات وكلبسات وبعض القير مثلا قير العادي للجمس الجديد البيرنقات فيها بلاستك

فا فايدت الزيت يحافظ على حرارة البيرنقات وتاوابعها حتا لو تلاحضون
اذا شغلنا السياره وهي بارده
وعشقنا تحس ان النمر تطول على ماتغير ليش
لان الحساس حق التغير بارد ينتضر لين يوصل حراره معينه بعدين يغير (يعشق)

في نصيحه لكم يشباب اذا شغلت الموتر وهو بارد بعدين سخن وعشقت ومشيت لا تجر على السياره لين تاخذ تقريبا 250-500متر بحيث ان الزيت اللي في القير تحرك وبدا يكسب حراره دافي نسبيا
وارجو اني افدتكم بشيء

[سعدالسعود]

بما أن الجمس أمريكي الصنع وميلاده الأول ولاية تكساس الحارة المقاربة لأجواء المملكة ..
ما زلت أذكر جيداً حديث الأمريكي الذي يعمل في ارامكوا عندما أخبرنا أنهم لا يعرفون ثقافة تغير الزيوت بل فقط صيانتها وزيادتها في حال النقص ، وهذا يجرنا للإيميلات الأخيرة المنتشرة حول أن الأهم في الزيت اللزوجة وليست مدة استخدامها وأن التحمية ليست ضرورية بل التدرج في السرعة ..
رسونا على بر ، نغير زيوت السيارة كلها أو نزيد ، يعني أمور الصيانة تحتاج مرجع معتمد يريحنا ..
علماً أني أغير زيت المكينة والفلتر كل 5000 آلاف لأننا تعودنا وليس لقناعتي بضرورة ذلك ..

[المركاز]

شرح وااااااااااااااااااااافي يالغلا يعطيك العافية ،،،،،،
فيه بعد نقطة ودي اقولها لكم وهي تنظيف او تغيير فلاتر المكيف وتجي عند الراكب تحت وعددها فلترين نظفها أو غيرها وسعر الوحدة الاصلية 40 ريال ليش تغيرها لانها تعطيك جودة وهوا كثيف ونظيف وللجميع ارق التحية واذا بغيتوا ادرجها لكم صور عطوني خبر ،،،،،

[علي السالم]

تحياتي لك اخوي واشكرك

[G M C BLACK]

يعطيك الف عافيه

والله انها حاجات واجد لازم الواحد يتفرغ كم يوم

جزاك الله خير

[تناهيت]

موضوع مفيد يستاهل الرفع لأني رجعت له ابي معلومه شكرا مره اخرى اخوي كبتشينو

[نسكافيه]

بما أن الجمس أمريكي الصنع وميلاده الأول ولاية تكساس الحارة المقاربة لأجواء المملكة ..
ما زلت أذكر جيداً حديث الأمريكي الذي يعمل في ارامكوا عندما أخبرنا أنهم لا يعرفون ثقافة تغير الزيوت بل فقط صيانتها وزيادتها في حال النقص ، وهذا يجرنا للإيميلات الأخيرة المنتشرة حول أن الأهم في الزيت اللزوجة وليست مدة استخدامها وأن التحمية ليست ضرورية بل التدرج في السرعة ..
رسونا على بر ، نغير زيوت السيارة كلها أو نزيد ، يعني أمور الصيانة تحتاج مرجع معتمد يريحنا ..
علماً أني أغير زيت المكينة والفلتر كل 5000 آلاف لأننا تعودنا وليس لقناعتي بضرورة ذلك ..

صدقت وانا اخوك

بس وظع السيارات عندك في السعودية غير

لاشك اننا نواجه غش ونصب حقين البناشر

جايب له الزيت يقول لي اسود غيرة عشان الصيف ومدري وشو وهو ماشي 3000 كيلو وياويلي من الله كاني ظالمه

والله انه يقول لي غيرة مايصلح

والهدف مادي

ولكن الله المستعان



شرح وااااااااااااااااااااافي يالغلا يعطيك العافية ،،،،،،
فيه بعد نقطة ودي اقولها لكم وهي تنظيف او تغيير فلاتر المكيف وتجي عند الراكب تحت وعددها فلترين نظفها أو غيرها وسعر الوحدة الاصلية 40 ريال ليش تغيرها لانها تعطيك جودة وهوا كثيف ونظيف وللجميع ارق التحية واذا بغيتوا ادرجها لكم صور عطوني خبر ،،،،،

جزاك الله خير على التنبيه ويعطيك العافية

ولكن هذي من 2002 وتحت

2003 وفوق مافيه

لو فيه والله لك هدية لان عندي المكيف اعاااني منه


تحياتي لك اخوي واشكرك

يحييك ربي ويخليك الف شكر


يعطيك الف عافيه

والله انها حاجات واجد لازم الواحد يتفرغ كم يوم

جزاك الله خير

والله صدق افطنوا لمواتركم عشان لين احتجتوها لقيتوها :43774.imgcache[1]:


موضوع مفيد يستاهل الرفع لأني رجعت له ابي معلومه شكرا مره اخرى اخوي كبتشينو

يخليك ربي

ولكن الايتثالزوند ون هندرد الحالة :43553.imgcache[1]::43553.imgcache[1]:

[علوش]

الله يعطيك العافيه

[جوالة]

الله يعطيك العافية

[YOKON2009]

هذي الاشياء اذا صارت سيارتك لها سنتين ممكن اما واحد سيارته موديل 2009 او 2010 ويسوي كذا غلط

لأن السيارة جديدة ومايمديها تخرب او يجيها شيء وثانيا مصاريف ع الفاضي

[فوازراشد]

يعطبك العافيه نصايح مهه بالفعل

[مشاري12]

بارك الله فيك ورحم والديك موضوع متعوب عليه متميز
الله يجزاك الف خير

[بن ضويحي]

يعطيك العافيه ...بس فيه وجهة نظر.. حتى زيت الفرامل ينبغي انك ماتزوده لان مقدار الزيت يعلمك عن نسبة تأكل الفحمات وزي ماقلت انت انه يعتمد على ضغط والسوائل ماتقبل الانضغاط وراح يتوجه الضغط لأقل نقطه وهي الربلات ويبدا التهريب ...تقبل مروري ... ولاعدمناك

[العنزي]

الله يعطيك العافيه اخوي

[NITRO]

معلومات مفيده لكن فيه مصيبه قلتها بتغيير زيت الدفرنس انت تنصح الناس ومشكور على النصيحه بس اللي بيروح يغير زيت الدفرنس على كلامك بس راح تون معه الكارونه ونسيت اهم شي بتغيير زيت الدفرنس الا وهو معالج الإحتكاك وأسمه Limited Slip Additive وتحصله بالوكاله وسعره على خبري 25ريال وعلبته صغيره 250مل ربع لتر يعني لو بغيت تغير زيت الدفرنس سواء الأمامي أو الخلفي لازم تحط علبة معالج زيت الدفرنس وهو مانع للإحتكاك اتمنى تتقبل مني هذا النقد بصدر رحب ووالله لو غيروا الأعضاء زيت الدفرنس وطلعت ونه بسبب عدم اضافة المعالج احس انك بتنطق طق ههههههههههههههههه:43753.imgcache[1]::43753.imgcache[1]::43753.imgcache[1]: وللأسف اكثر الناس جاهلين علبة المعالج زي واحد من ربعي حريص على موتره غير الزيت حق الدفرنس من حرصه على الموتر وطبعاً ما عطاني خبر وبعدها بأسبوع اتصل على وقال الدفرنس فيه ونه قلت انت مغير الزيت قال ايه قلت حطيت معالج مع الزيت اللي غيرته قال لأ قلت الله يعينك على الدفرنس الجديد وبالتوفيق ......
وهذا رابط المعالج اللي يحط مع زيت الدفرنس عند تغييره
http://paceperformance.com/images/F15182796.gif

[راعي السوبر]

ماقصرت يالغالي

لاكن زيت الدفرنس انا من شريته وهو على حالته ماتسد غيرته

وصاير زي الماء ولزوجته خفيفه

واخاف اغيره يخرب علي الدفرنس

وش تشورنا عليه يابعدي

[ابوحميد]

اولا مشكور يالغالي على موضوعك الهام والذي يحتوي على معلومات قيمة الصراحة
لكن يالغالي عندي استفسار بخصوص تنظيف البخاخات
انا الحقيقة كل شغلي عند مركز acdelco
واخر مرة عملت تصفية مكينة قامو بتنظيف الخانق ويوم جيت استلم السيارة اعطوني منظف بخاخات بعدد علبتين وطريقة استخدامه انك تحطة في تانك البنزين اذا جيت تعبي فل

والسؤال : هل استخدام هذا المنظف كافي لتنظيف البخاخات ام لابد من استخدام جهاز التنظيف الموجود لدى الورش؟؟؟

ومشكور يالغالي على مجهودك الرائع ..... وتقبل تحياتي