طلب إفادة / آلية معرفة مكينة 78 وهي راكبة في السيارة ..

[خطّاف]

اسعد الله أوقاتكم بالخير
لا يخفى على الجميع أنه يوجد فرق في مكينة 78 عن باقي المكاين التي نزلت بعدها
والسؤال هو / كيفية معرفة مكينة 78 وهي راكبة في السيارة هل يوجد علامات ودلائل عليها ؟
مثال / مرة شفت جمس موديل 78 معروض للبيع لكن الكلبليتر ماصورة على جنب وجاني شكوك أن المكينة مغيرة وأبي أزيل الشك بالقين .
للإحاطة / تم الإطلاع على مواضيع الخبير الكلاسيكي العضو/ البهبهاني المغترب
فآمل من لدية معلومة التكرم بالإفادة عنها الموضوع في غاية الأهمية
أخوكم / خطاف

[ابوسهارى]

لتشيل هم وأنا اخوك فيه رقم يحددلك المكينة هل هي حقت 78 او 79 وفوق
تشعبط هههه فوق المكينة وتشوف بين الغمارة والمكينه خلف الديلكو تحت تلقى شفة البلوك السرندل يعني اللي يركب تحتها الداير يوجد رقم يحددلك موديلها وهذا الرقم والله يجهلني الاان ناسيه لاكن ابو حصه (شفر454) هو اللي حافضة لو ترسله رساله خاص يفيدك برقم لتحديد المكينه وموديلها

[خطّاف]

العضو / أبو سهارى .. لا هنت على الإفادة .. وفقك الله
الأعضاء من لدية مكينة 78 طرح الرقم ووضع صور عن كيفية معرفتها
كما أفاد العضو/ أبو سهارى في الرد أعلاه
الهمه يا شباب

[شقران]

ياهلابك اخوي خطاف ..


بالنسبة للمكينة تعرفها من الثلاجة تكون ثلاجتها ارفع من ثلاجات الموديلات الثانية والرفع فيها اوضح بكثير من غيرها ..


والفرق الداخلية طبعاً ماراح تقدر تشوفها والمكينة شغالة لكن الثلاجة هي البينه الوحيدة بغض النظر عن الارقام ..

[الظاهري]

بالنسبه لرقم المكينه ماتستطيع تراه لانه تحت الحذاف وصعب تشوفه والمكينه راكبه والقير امغطيه

تقدر تعرف بالثلاجه حق 78 تجي مرتفعه اشوي والمساحه الي بين الكبليتر وكوع الماء طويله

ماهي مثل حق 79 وفوق تجي الثلاجه نازله والمسافه بين الكوع والكبليتر قصيره يعني

لو ركبت كبليتر ماصوره قدام ايحشر الكوع حقت ماصورة البنزين

معلومه اخرى عن ثلاجة 78 يجي بجنب الكبليتر يسار تحت منظم الدعسه فتحه بالثلاجه

ويركب عليها اسبرنق ملفوف وبلف صغير يطلع منه ماصوره هواء تطلع قدام وترجع مره ثانيه للكبليتر

وتركب في لي صغير يركب في منظم الهواء من جهت الكبليتر اليسرى

معلومه اخرى لايوجد فتحات بالثلاجه من فوق مثل 79 اتحصل فتحه يمين مربعه او مستطيله ومسكره

في مسامير

وكل هالكلام مايبن ان المكينه حق 78 ممكن حق 79 ومغيره الثلاجه

الله يعينك ويسهل امورك

[VTC 3333]

ماشاء الله تبارك الله عليك يالظاهري


الصراحه وصف دقيق الله يعطيك العافيه

[ذيبان 78]

​ماشاء الله يابو ممدوح شرح واضح جدا

[لورنس]

كفيتم ووفيتم ابو سهارى و ابو سليمان وابو ممدوح ما قصرتوا على المعلومات

[أبـو تـركـي]

شرح وافي من الاخوان الله يعطيكم العافية

تحياتي

[خطّاف]

مؤسس ومدير عام النادي / شقران
لا هنت على المعلومات يـ أبوسليمان وبيض الله وجهك

[خطّاف]

المشرف المحترم والخلوق / الظاهري
معلومات وافية وواضحة المعنى ـ ماشاء الله تبارك الله ـ وفقك الله أينما تكون

[خطّاف]

العضو / vtc 3333
العضو / ذيبان 78
العضو / لورنس
العضو / أبو تركي
كم أنا سعيد بمروركم وتشريفكم على الموضوع
حفظكم الله من كل مكروه