أبـي شـوركــــــم يالـربــع

[الـشـمـGMC-1981ــــــــري]

السلام عليكم ورحمه الله وبركاته
الله يتقبل صيامكم وقيامكم بشهر رمضان الفضيل واعاده الله علينا وعليكم

وكل عام وانتم بخير ... ومـن العـايدين قبل الزحمه



الموضوع ومافيه يا اخواني اني محتار وضاقت فيني الوسيعه

انا معاي جمس حوض موديل 1981 وحاط له صور من قبل

بس الموضوع ومافيه اني ابي اجدد الموتر كامل ابي ارشه كامل وابي اجدد ديكوراته من داخل والموتر يبي لها ميكانيكا ابيه يطلع معرررس جديد ... أنا من سكان الرياض والمشكله اني ماعرف احد :107[1]: ماعرف ورش زينه لها خبره بالجموس تكفون اللي له خبره بالرياض لا يبخل علي الناس تفكر وش تشتري وتلبس بالعيد وانا افكر وشلون ارجع الورث جديد لأنه ورث وغالي علي



الموتر يبي له شغل وانا مدري وش السواه ... دلوني على ورش / احد له خبره بالترهيم والتجديد


الله لا يهينكم كلكم

[ذيبان 78]

وعليكم السلام ورحمة الله وبركاته
اخوي ترا الموتر بياكل كثير
بس ان كان تسمع مني غير الي خربان
مهوب لازم كل شي جديد
والجموس ازين مافيها تخلي كل شي شد بلد
وانت بكيفك تقبل مروري

[madczar]

يجونك اهل الرياض ويفيدونك ان شاء الله

[رفرف البحرين]

دكتــــــــــــــــــــــــــور الظاهري شوفه

[الـشـمـGMC-1981ــــــــري]

يعطيكم العافيه كلكم على مروركم

ذيبان انا بجدد على شوي شوي ولا خابر وانا اخوك انه بياكل بس فدا فلوسي تروح بموتري ولا اضيعها يمين ويسار

[ابو جماس]

حياك الله يالشمري يامرحبا ومسهلا

بالنسبه للورش انا من هل الشرقيه

وعندك ورشه المعيوف بقياده الخبير امين مقداد

فالدمام فالخضريه وان كانك بتروح له فعز الله بيلبي طلبك

واما الرياض ماعندي فيه

[الـشـمـGMC-1981ــــــــري]

الله يحيك ويبقيك أبو جمآس ... ماهي شينه أروح للدمام إذا مالقيت يسنعني في الرياض عز الله اني باروح للدمام لأن في كم محل مذكور لي بالدمام ... لاكن ان حصل بالرياض يكون افضل



وشكراً على مرورك

[عبدالعزيز454]

يامرحبا ومسهلا اخوى الشمري اول شي حدد وش بتبدى فية مكنيكا او رش بوية عشان نقدر نوجهك ونشاء الله امورك سهالات

[الـشـمـGMC-1981ــــــــري]

البقا ... اخوي عبدالعزيز انا ناوي ابدا اول شي بالبويه برشها ويبي لي سمكره بعد وياليت تفيدني بمعلومات وشكراً على مرورك

[عبدالعزيز454]

اخوي الشمري شف بعد العيد ان الله احيانا يوم يناسبك واروح انا وياك لورشة فى صناعية الشفاء وشف شغلهم فى السمكرة والبوية وبعدها قرر اذا جازلك شغلهم ولك كل احترامي وكل عام ونت بخير

[الظاهري]

كل عام وانت بخير
بالنسبه لشغل انصحك اشتغل ميكانيكا قبل البويه

فيه ورشه بالنسيم بصناعية الامير فواز على طريق خريص وانت رايح شرق مع طريق خريص اتعدي النفق حق مخرج سليمان الفارسي وبعده يجيك مخرج على طول بعد النفق اطلع معه وخلك بالخدمه حتى اتعدي اسواق ماكس بعد ماكس يجيك مباني شركات عرض معدات بعده ادخل يمين على الصناعيه تجيك الصناعيه على يسارك ثاني شارع ادخل يسار ثم ثاني شارع ادخل يساربعد المسجد تجيك ورشه عبدالله الرقيبه تفتح غرب اتحصل ابو مشعل قله من طرف ابو ممدوح والرجال خبير اجموس وماهو مقصر

[الـشـمـGMC-1981ــــــــري]

و انت بخير اخوي عبدالعزيز بإذن الله بس ماودنا نتعبك معنا لاهنت ...

[الـشـمـGMC-1981ــــــــري]

الله لا يهينك يالضاهري ويعطيك العافيه وماقصرت وبروح للرجال والطيب مايدل الا على الطيب

[ذيبان 78]

بالله عطنا التقرير لا تنسى

[عبدالعزيز454]

مافية تعب ونا اخوك كلنا نكمل بعض فة هاالنادي الى له الفضل بعد الله وخلنا نتعرف على الرجال الى مخوتهم تنشرى بس انت شف اى وقت وعطني خبر

[الحداوووي]

اعجبني ردك اخوي عبدالعزيز 454 ولا يهينون الاخوان

قول وفعل

[ذيبان 78]

يستاهل أبو احمد.

[عبدالعزيز454]

اعجبني ردك اخوي عبدالعزيز 454 ولا يهينون الاخوان

قول وفعل
ماعليك زود فديت خشمك كلنا اخوان ونخدم بعض